Sigurður Atli Jónsson, forstjóri Kviku, afhenti í dag
Ragnheiði Elínu Árnadóttur, iðnaðar- og viðskiptaráðherra skýrslu um
niðurstöður rannsóknar á þjóðhagslegri hagkvæmni raforkusæstrengs til
Bretlands. Skýrsluna, sem er mjög ítarleg, vann Kvika fyrir atvinnuvega- og
nýsköpunarráðuneytið og hófst vinna við hana fyrir um ári síðan. Að þessu
umfangsmikla verkefni kallaði Kvika til samstarfsaðila sem búa yfir fjölþættri
sérþekkingu, m.a. alþjóðlegt ráðgjafafyrirtæki á sviði orkumála í Evrópu.
Kvika leiðir hóp sérfræðinga
Skýrslan
var unnin af sérfræðingum Kviku og fékk bankinn að auki til starfa ráðgjafa frá
Pöyry, sem er eitt virtasta ráðgjafafyrirtæki á sviði orkumála í Evrópu,
lögfræðistofunni BBA Legal og áhættu- og fjárfestingaráðgjafafyrirtækinu
Analytica.
Sigurður
Atli Jónsson, forstjóri Kviku, leiddi stýrihóp verkefnisins en í honum sátu,
auk Sigurðar Atla þeir Sigurður Hannesson, framkvæmdastjóri eignastýringar
Kviku, Magnús Bjarnason, framkvæmdastjóri fyrirtækjaráðgjafar Kviku, Dr. Gareth
Davis forstöðumaður hjá Pöyry og Michel Martin ráðgjafi hjá Pöyry.
Við
framkvæmd rannsóknarinnar var aflað gríðarlegs magns gagna og óskað var eftir
ábendingum, áliti og endurgjöf frá hagsmunaaðilum og fjölbreyttum hópi sem býr
yfir sérþekkingu um málið.
Sæstrengur til Bretlands hagkvæmur
Þjóðhagslegur kostnaður og ábati af
áhrifum raforkusæstrengs milli Íslands og Bretlands var rannsakaður ítarlega. Í
niðurstöðum rannsóknarinnar kemur fram að framkvæmdin gæti reynst báðum löndum
þjóðhagslega hagkvæm og skilað þeim samanlögðum nettó ábata sem nemur 2,9
milljörðum evra eða um 400 milljörðum íslenskra króna. Nettó ábati fyrir Ísland
er áætlaður um 1,4 milljarðar evra eða um 200 milljarðar króna og myndi
verkefnið hafa jákvæð áhrif á landsframleiðslu um 1,2-1,6% árlega sem teljast
umtalsverð varanleg jákvæð áhrif. Niðurstaðan er háð ýmsum forsendum, m.a. þeim
að Bretar veiti umtalsverðan fjárhagslegan stuðning til verkefnisins á
grundvelli stefnu um minnkun gróðurhúsalofttegunda, að nægjanlega margir
orkukostir séu í boði á Íslandi og að samkomulag náist milli landanna um
hagkvæmt viðskiptalíkan fyrir verkefnið.
Án mótvægisaðgerða gæti lagning sæstrengs til
Bretlands leitt til hærra raforkuverðs á Íslandi um 0,85 – 1,7 kr /kWst. Meðal
heimili myndi greiða um 350 – 710 krónum meira fyrir rafmagnið á mánuði.
Möguleg mótvægisaðgerð væri til dæmis færsla raforku í neðra virðisaukastig og
myndi sú aðgerð eyða út áhrifum sæstrengs á raforkuverð.
Gert er ráð fyrir að sæstrengurinn verði 1.200
kílómetra langur og að uppitími hans verði 92% á hagrænum líftíma hans. Nýtt
framboð rafmagns á Íslandi er áætlað að komi úr „nýtingarflokki“ rammaáætlunar
en leiðrétt hefur verið vegna óvissu um stærð og leyfisveitingar vegna
jarðvarma. Viðbætur yrðu gerðar við virkjanir sem þegar eru í rekstri og
uppsprettur orku sem ekki voru í 2. rammaáætlun ríkisstjórnarinnar hafa verið
taldar með, svo sem litlar vatnsaflsvirkjanir og lágjarðvarmavirkjanir. Þar sem
þessi orka dugir ekki til hefur einnig verið gert ráð fyrir vindorku á landi.
Skýrsla Kviku
